Lungawina chi hnih

Hlimna te, lungawina te hi ka thlakhlelh em em leh neih tuma ka hun leh tha, rilru leh ngaihtuahna ka sen thin chhante an ni fo. Mahse hlimna te lungawina te hi a tha chi leh tha lo chi a awm a ni.

Hlimna/Lungawina tha lo zawk: Hei hi a tha lo zawk nimahse mi tam zawk leh keimah pawhin ka thlan zawk fo thin chu a ni.

Chu thil chu eng nge?

Ka nunah hian duhthlan tur a awm thin a, entirnan, lehkha ka zir a, ka subject har tih tak mai a ni a, ka ning ang reng hle mai a, ban daiha phone khawih mai mai ka duh a ni. Tichuan, chu hlimna chu thlang zawkin ka lehkhazir lai chu chawlin phone khawihin hun ka khawhral ta mai mai zawk a. Tichuan, a hnuah inchhirna ka nei leh thin. Rei lote hlimna, tuna hlimna min pe nghal thei thil tam tak tehi a tlo lo tlangpui a, mahni inchhirna a thlen thin a ni.

Hlimna/Lungawina tha zawk: Hei hi a tha zawk nimahse mi nawlpuiin kan thlang ngai lo. 

Chu chu eng nge?

Ka lehkhazir chu ka ning viau maia, thil dang nuam zawk tih ka duh khawp mai a, phone khawih mai ka duh a, ka bulah ka inchhawp reng bawk a, nimahsela, "He thil tuna ka tih chak hian rei lote chiah hlimna minpe dawna, a bak zawng chu inchhirna tur vek a ni, nimahsela lehkhazir hi ning mah i la, zir chhunzawm ka thlan zawk chhan nakinah thiamna leh hlawhtlinna minpe dawna, sense of satisfaction min pe dawna, nakina ka hlimna tur zawk a ni," tiin nakina ka hlimna tur zawk chu ka thlang ta zawk a ni.

Chuvangin, tun atang chuan ka nunah hian hlimna leh lungawina ka zawnna lamah duhthlan tur a awm hian ka thlang fimkhur tawh tur a ni. Tuna hlimna min pe thei thil thlan mai awlsam leh chakawm takte hi ka thlan hmanin ka fimkhur tur a ni. "Nakina inchhirna leh lungngaihna tur hlimna ka thlan ai chuan, nakina hlimna minpe thei leh ka tana tha zawk hlimna dik leh tlo zawk hi ka thlang tawh tur a ni," tiin mahni ka inzawtin ka inhrilh tawh zawk thin tur a ni.