Sawma Pakhat Pek Chungchang - Rinna

Sawma pakhat pek tihah hian rilruah chuan pawisa leh kan thil neih pek hi a lang ber thin a ni. Mahse kan sum leh pai mai bakah hian chung zawng zawng aia hlu zawk chu kan hun hi a ni. Nikhatah dar 24 kan nei a, kan nitin nunah hian Isua Krista tan sawma pakhat kan hun kan pek chuan rah a chhuah nasa ngawt ngei ang. Lalpa hi a thilphal em em a. Mal min sawm te hi a duh thin ngawtin ka ring. Lalpa tana ka hun atangin sawma pakhat ka pek hian Lalpa chu ka ring a ni tih a takin ka lantirna pakhat a ni ngeiin ka hria. A chhan chu he khawvelah hian thil hrang hrang kan ngaihtuah a. Nih tum leh tih tum te kan nei a ni. Chung thil kan duhte chu nei turin kan hun kan hmanga kan tha leh zung kan seng thin a ni. Hetiang kara Lalpa tana kan hun te kan pek ngamna tak hi Lalpa kan rinna lan chhuah tirna chikhat a ni. A chhan chu Lalpa tan ka hun hi ka pe anga, hemi avanga ka duh ang ka lo neih loh phah emaw ka duh ang tipuitling tura ka hun duh lai chu Lalpa tana ka pek avang hian tisa taka ngaihtuah chuan chu ka hun chu ka chan anga ngaih theih a ni. Mahse Lalpa ka rinna avanga ka hun ka pekna hian a entir chu, he hun hi hnathawh nan ka duha mahse Lalpa tan ka pe ang, Lalpa'n ka mamawh tur chu min pe mai ang, tihna rilru ka pu zawk a ni. Hei hi rinna Lalpa'n  min ngaihtuah sak ang tih rinna a taka lan chhuah tirna chi khat niin ka hria a ni. 

Lalpa hian a mite chungah hian a chakzia hi lantir a duh em em a ni. 
2 Chronicles 16:9 ah chuan heti hian a inziak a ni. "A lama rilru dik tak putute chunga a chakzia tilang turin khawvel zawng zawngah LALPA mit chu a leng ruai ruai thin a ni. Atthlak takin thil i ti a nih hi; tun achinah chuan do i nei reng tawh ang." a ti a."

Lalpa hian thinlung taka Amah ringtute hi min lawm ngawtin ka ring thin a ni. Keipawh hian Lalpa ka rin dawn apiang hian dil chhutna te, rinhlelhna te leh overthinking dawn dawn ang te hian ka awm tlat zel a, hei hi ka tan chuan fiahna ka paltlang tur a nih loh pawhin thlemna emaw beihna ka tawh tur ka hneh tur a nih ka ring a ni. Lalpa hi thinlung zawng zawnga rin ka chak thin hle a ni. 

Lalpa hi A thil phala. Amah hmangaihtute leh ringtute hi mal min sawm a chak thin ngawtin ka ring a ni. Bible chang pakhatah chuan Lalpa chuan heti hian a sawi a ni.
Malakia 3:10 "Ka inah ei tur a awm theih nan sawma pakhat zawng zawng chu thawhlawm inah rawn la rawh u, van tukverh te chu hawnsak che uin malsawmna dawn sen loh khawp hial ka vur dawn che u nge dawn lo, mi han fiah teh reng u, sipaihote LALPA chuan a ti." Thufingte 11:24  "Sem darh chîn chu ngah lehzualna a ni, Mi kawm tak nih chu tlâkchham ngahna a ni."

He Bible changa kan hmuh ang hian Lalpa hian Ama tana kan pek chhuah te hi a ba ngai lo a, a zat pek let chu sawi loh dawn sen loh khawp hial zawkin min rawn rul let duh thin niin a lang a ni.

Thilphal tak, hmangaihna Pathian, ngilnei em em kan nei hi kan vannei hle a ni. Chuvangin sawma pakhat kan pek chhan hi pek a ngaih vanga pe ni loin, Lalpa kan rinna leh hmangaihna tihlan nana pe zawk tur kan ni a, ui lovin lawm takin kan pe zawk tur a ni. Lawm taka pek hi Lalpa duh dan pawh a ni.

Tunhnai chu Pu Dennis-a team Breakthrough Ministry an niin ka hria, heng ho hian Saikuti Hall Lunglei-ah rawngbawlna an nei a, online-in ka ngaithla ve a zan hnih vel chu. Pu De-a sawi tha ka tih deuh pakhat chu hei hi a ni: "I hun hi sawma pakhat pe chiah la maw, nitin darkar 2 leh a chanve Lalpa bulah awm tawp mai la maw, darkar dang zawng kha rah a chhuah tir nasa dawn lutuk, halleluiah." tiin a sawi a ni.

Rinna leh sawma pakhat pek hi thil inzawm tlat ni hian ka hria a ni. Chuvangin Isua Krista zuitute hi chu ringtu kan ni a, khawvel thil taka awihawm loh pawh hi Lalpa thu a nih chuan ring bur zel tawp tur kan ni a. Khawvel ngaiha atthlak thilte hi Lalpa duh dan a nih chuan kan tizel mai tur a ni. Khawvel ngaiha thil theih loh te hi ringtute chuan Lalpa duh dan a nih chuan tih theihna Lalpan min pe zel dawn a. Natna tihdam theih lohte pawh hi Lalpa rinna avangin Lalpa thu ang zelin kan tidam zel thei mai dawn a ni. 

Chuvangin Kristian te chu kan nitin hun hmannaah hian kan rinna hman chhuah dan dap thin ila, tah hriam deuh deuh i tum zel ang u. 

Nikhata kan thil tih tur 'to-do list' kan siam thin ang hian, Lalpa ka rinna hi a taka lanchhuah tir dan tur kawng khat talin kan tih tur 'to-do list-ah' han ziak thin i la a tha ngawtin ka ring. Zing kan thawhphat atang hian vawiin chu Lalpa nen hun ka hmang thei leh dawn ta. Vawiin hian Lalpa ka rinzia hi engtin nge ka lanchhuah tir ang aw tiin mahni han in-challenge thin ila. Lalpa rawn tlat chungin Amaha innghat vek chungin ngaihtuahna han seng ila, kan theihna zawn zawnah Lalpa kan rinna hi hman chhuah i tum tlat zel ang u.