All I have is Jesus. Hallelujah

He khawvel hringnun zinkawng ka zawh lai hian, hlawhtlinna chan te, hausakte ka chak a; ka tum ram thleng turin mahni inthununin hma lam panin thil ka ti thin a. A chang chuan a tawpah ka duh angin hlawhtlinnate ka hmu a, ka beisei angin thil a thleng fo thin a ni. Ka lawm thin em em a ni. Amaherawh chu heti zawng hian ka ngaihtuah a, mite hmuh leh ngaihdana ka chaknate, ka thatnate hi a lo tam telh telh hian ka hriat loh lai hian Lalpa hi ka lo hlat telh telh thin a lo ni a. Hlim taka Amah fakte, thinlung zawng zawnga Lalpa hnena tawngtaite hi ka harsat leh ta fo thin a ni. He'ngte avang hian he ti hian ka ngaihtuahna a kal neuh neuh a, he khawvela ka neih chak te, ka nih chak te hi Isua Krista phalna lo chuan ka ti ngam tawh vak lo a ni. Isua min hlattirtu atana ka hman dawn chuan chan mai ka thlang zawk e. Ka mihring mihrinna chuan huphurhin, zuam dawn lo mahsela, Isua duh dan a nih chuan lo chak loh phah dawn mah ila, lo pachhiat phah dawn mah ila, tih ka tum zel ang, ka Lalpa Isua chakna rinchhan chung zelin.

Isua hi hmasial takin ka zui thei lo, Amah avangin ka chanin ka tuar ve ngam tur a ni. Mite'n min hmusitin, mite phak loh nan hmang dawn pawh ni ila, Isua duh dan a nih chuan tih ka tum fan zel ang. Lalpa chuan Amah ringtute chu A kalsan dawn si lo va. Sual zakzeh chunga hmasial taka Lalpa belh ai chuan lang tlang takin ka sualna zawng zawng, ka chak lohna zawng zawng nen Isua Krista pan ka duh zawk a ni. Lalpa, min tanpui ang che. Nangmah chauh hi ka neih chhun ni ang che. Isua Krista hmingin, Amen.