Lalpa hian a rilru a lamlet thin em?
Hmangaihna anih avangin a lamlet thei a ni ang. (Jonah: 3:10)
Anih chuan Lalpa chu a thuah a ding nghet lo em ni? Ngatinge Nineveh mite chu a hrem leh si loh?
Lalpa'n heng mite chunga tih a tum, a sawi tawh chu a ti leh ta lo a ni. Ka ti ang chu a tih hmel a, mahse a ti leh ta lo. Pathian mahni thua ding thin a ni lo tihna em ni le? tia zawhna hi chhan ka han tum chhin teh ang.
Entirnan: Ka pa hian min hmangaih em em a, mahse kei ka sual si a, ruk ka ru thin a. Tum khat chu ka pa chuan ruk i ruk leh chuan ka in atang hian ka hnawt chhuak ang che anga, eng tikah mah i lo let leh thei tawh lovang a ti a.
Tichuan, ruk chu ka ru leh ta a, mahse ka inchhir em em a, ngaihdam ka dil ta ngawih2 a.
Ka inchhir tak zet a ni tih a hriat hnu chuan a thil sawi leh a rilru chu a lam let leh ta zawk a. Tichuan a kiangah chuan ka chen theih phah ta a ni.
Hetah hi chuan Ka pa hi a thusawiah a ding lo a tih theihin ka hre deuh a.
Anih chuan ngatinge Nineveh mite ka hrem ang tia a lo sawi kha hrem leh si lovin a ngaihdam tak mai le, a thusawiah a ding lo tihna em ni? Heti hian zawhna a lo awm thei ta a.
Ka rin dan chuan Lalpa khan ka hrem ngei ngei dawn che u timai lovin, insual luih zel chuan ka hrem dawn che u, a ti zawk pawh a ni mai thei a. A hremna chhan tur kha condition a pe ngei ang. Chu a condition pekah chuan insual chuan ka hrem ang che u a ti lo a ni ang, insual a, insim duh loh zel chuan ka hrem ang che u, a ti zawk pawh a ni thei. Chuvangin ka hrem ang che u lo ti pawh nimahse, a hrem lohna chhan chu an sual vang ni lovin, sual mahsela an inchhira aninlamlet avangin a hrem ta lo a ni. Chuvangin hetah hi chuan Lalpa hi a thuah a ding lo tihna a ni kher lovang.
Entirna dang leh. Eden huanah khan Evi leh Adama kha condition a pe leh a, chu chu eithiang lo kha an ei chuan an thih tur thu a hrilh a ni. Tichuan an ei luitaa, an thi ta a ni, mahse, ngaihdam dil ta se, a rilru lamletin a thih tir lo mai angem? tia kan zawh chuan a thih tir tho ka ring. A chhan chu a thuah a ding nghet tlat dawn a ni. Amah erawh chu a condition pekah khan inei chuan inthi ang ti mahse la, ininchhir tak zet loh chuan inthi ngei ang tiin, condition pe tel se chuan a rilru lam letin a ngaidam duhin ka ring a ni. A chhan chu an inchhir miau a ngaihdam an dil chuan a ngaidam thei ang, a condition pekah a tel si a.
Anih leh Isuan khan Getsemani huanah a Pa hnena a tawngtai khan engvangin nge ka Pa he no hian min pe lul rawh se, mahse keima thu ni lovin nangma thu nizawk rawh se a tih? Khami hma pawh khan Isua khan a zirtirte hnenah a thih tur thute, a thih dan turte a hrilh vek tawh bawk si a, chutiang a lo nih chuan kha no khan lo pel ta se, a sawi angin a awm dawn lo tihna a ni si a. Engvangin Isua khan khatia a tih tak mai le?
Isua khan, kha no khan pel se ti a, a tawngtainaah khan a sawi hma khan he ti hian a sawi hmasaa, Ka Pa engkim I ti thei a, tiin, a Pa chu engkim ti thei a ni tih kha a hria a, khatiang khan a sawi hmasa phawt a ni a.
Isua kha mihring a ni a, he leiah rawng a bawl lai khan a Pa nen khan an inpawl fo va, tawngtai mi a ni a. Thil lo thleng turte pawh a mamawh ang tawk zel turin a nih ka ringa, hriat tir zel a ni a. Chung zingah chuan a thih dan turte leh a thawh leh turte kha a hria a ni. Chungthute chu a zirtirte hnenah khan vawikhat mai a sawi lo a, vawi khat aia tam a sawi a ni. Hre reng chung khan damlo a ti dama, a rawngbawl a thulh chuang lo.
Nimahsela, a hun, a darkar a lo hnaih tak takzet hnu kha chuan a huphurh ngawih ngawih a. Tuar lo i la aw, a ti ngawih ngawihin ka hria a ni. Nimahsela, kha a huphurhna kha mihringte min hmangaih loh vang a nimiah lo, kha a chanvo kha punpelh chu a duh khawp ang, theih nise tiin a dil a ni. Mahse min hmangaih loh vang a nimiah lovang. A huphurh vang a ni.
Pumpelh a duh si te chuan min chhandam dawn lo tihna ania min chhandam ai chuan na tawrh loh a thlang zawk tihna a lo ni anga, min hmangaih tawk lo tihna a nimai lawm ni? tiin zawhna lo awm ta se he ti hian i chhang teh ang.
Isua khan min hmangaih lutuk. Awih lo dawn mah ila, a nihna a ni, thudik a ni. Mahse engvangin nge kha no khan pel se a tihna chhan le? kan tih chuan Isua kha mihring a nih ang bawkin engkim hre vek lovin a awm a, khawvel tawp hun tur pawh kha a hre lo, Pa chauh lo chuan vana vantirhkohte pawhin an hriat loh thu a lo sawi tawh a nih kha. Hengte avang hian hriat chin leh hriat loh chin a nei niin a lang. Hei vang hian khatia a thisen chhuaka thihna tema thawh leh kha a tan ruat nimahsela, kha ti lo deuh khan kawng dang a awm thei dah lo maw tiin a Pa kha a dil a. Pathian chuan chutiang chu thil awm dan tur a ni, ka remruat dan a ni, lo ti tawh pawh ni se la, engkim i ti thei a, tia bul a tan ang khan Lalpa chuan engkim a tih theih avangin a nihna kalh chuang si loin, a thu a din ngeh loh phah chuang si lovin, kawng dang duhawm zawk a awm thei mial mahna tiin Isua khan kha no kha a Pa hnenah khan pelh a dil a ni ngei ang. Chuvangin min hmangaih loh vang nilovin, min chhandam a duh loh vang ni lovin, kawng dang a awm mial mahna tiin a thil hriat lawh tawh chu her rem dan a dil mai niin ka hria a. Mahse, Isua chuan a thu ang chuan nimai lo se, a Pa thu ang zelin ni zawk se, tiin a sawi tel bawk a ni.
Tichuan a tawngtai chhannaah chuan kawng dang a awm lo, kha no khan a pel thei lo, tiin chhanna a dawng a ni ngei ang. Isua khan Bible-ah khan heti hian a sawi a nih kha, "Aw ka Pa, ka in loh va hei hian mi pelh theih lul loh chuan, nangma thu thu ni rawh se," a ti a nih kha. Tichhan Pathian engkim ti thei, dik lo thei lo Pathian chuan kawng dang a awm lo, kha no khan a pelh theih lul lo thu kha a hriat tir a ni ngei ang. Tichuan Isua chuan thuawih takin min hmangaih em em chungin huphurh tak chungin a chantura ruat chu a lo hlen ta zawk a ni.
Isua hian min hmangaih zia hi hei aia chiang deuh hian a sawi leh theih em?
Isua hian min hmangaih em em a ni. Min chhandam a duh a ni. Hreh ngawih ngawih mahaw min chhandam nan chuan thih a pawisa miah lo a ni, he Bible changah hian a chiangin ka hria. Matthaia 26:52 thlaah khan heti hian Petera a hrilh a ni (Petera khan Isua a chhanna lamah a ni ang, bawih pakhat beng kha a sahthlak sak a ni). "I khandaih kha a dahnaah dah leh rawh, khandaih ruaitu zawng zawng chu khandaih vekah an thi dawn si a. Tunah pawh vantirhkoh sangruk hmun sawm leh hmun hnih aia tam zawk mi rawn tirhsak turin ka Pa hnenah ngen thei lovin mi ring em ni? Nimahsela, ngen ang ila, engtin nge Pathian Lehkha Thu, hetianga a lo awm tur thu hi, a thlen theih ang le? " tiin a sawi a ni. Aw le, Isua khan khatia noin a pelh thei lo a ni tih a chian hnu khan, a inpeih fel vek tawh a ni. Peteran Isua man an tumna kha tih sukuk thei tur ang zawngin chet lo la mahse, Isua khan a khap nghal vat a ni. A chhan chu Isua khan a thiltihtheihna kha hmang duhin a Pa hnenah khan tanpuina a dil thei a ni, mahse dil dihna rilru a puta a dil chuan khang ho khan an man dawn lova, min chhan damna hna kha a bawhpel thei a ni. Chuvangin a dil duh lo, a sahimna a zawng duh tawh lo, a mah chhantum Petera pawh a khap tawh zawk. Kan tan thih a thlang zar zar ta zawk a, a tawp thlengin min hmangaihna avangin thuawih pumhlum thakin a thi ta zawk a ni.
Isua khan a chanvo (fate) kha hre mahsela, a Pa hnenah khan kha no khan pelh a dil tho a ni, a huphurh em em si a. Tichuan thihna hneha a thawhlehhnu khan he ti hian a zirtirte hnenah a sawi a, "Heng hi ka thu kha a ni, Mosia Danahte, Zawlnei Lehkhabuahte, Fakna Hla Buahte, ka chanchin ziak apiang a lo thlen turzia in hnena ka awm laia ka hrilh che u kha, " tiin a sawi a. Hetah hian a thih hma khan a chunga thil lo thleng tur a sawi lawk a, mahse a lo then dawn hnaihah khan no khan pel turin a dil leh lawi si a, engvang nge, eng nge a chhan? tiin zawhna a awm chuan heti hian kan chhang leh teh ang.
Isua Krista kha zawlnei lehkhabuah te leh thil dangah a chanchin kha puan lawk a ni a, kha tiang deuh khan Ninevah mite kha Lalpan a hrem tur thu kha puan lawk a ni. Mahse ka sawi hmasak zawk khi a thleng a, a hnuhnung zawk khi a thleng lo thung.
Puan lawk ve ve chu eng vanga thlenga thleng lo thei nge a nih? tia zawhna a awm chuan, heti hian ka chhang teh ang
A hnuhnung zawk khi chu condition a awm a ni ngei ang.
A hmasa zawk pawh khi sawi lawk vek tawh nimahse, Isua khan possibility, condition a awm mial mahna tiin no khan pel turin a dil a ni thei.
Kha an puan lawk kha thleng ve ve se la chuan zawlneiten an puan lawk zia kha tiin a sawi theih ve ve tho ang.
Hetah Isuain a chanchin ziak apiang a lo thlen turzia a thawhleh hnua a zirtirte hnena a sawi ang khan, Nineveh kha hrem ta se, an chunga zawlneiin a thlen tur zia a sawi ang khan a tih ve theih tho ang. Mahse an danglamna lo nita chu Nineveh kha chu condition dang, possibility dang a awm a. Isua erawh kha chu condition dang, possibility dang a awm lo a ni.
Isua khan hre lawk mahse, hrilh hriat nimahse la, a mihring mihrinna kha chuan a huphurh em em a, chuvangin Getsemani huanah khan a Pa hnena a tawngtai khan, no khan pel tura a dil hma khan, Abba engkim i ti thei a, tiin a sawi hmasa phawt a ni. Chuvangin a Pa hnenah khan kha a chanvo ruatsa kha tih danglam dan, Lalpa nature kalh si lo, a thu a din ngheh loh phah chuang si lo, hringfate tlan loh phah nana hmang chuang si lo va kha noina pelh tir kha a dil ni berin a lang zawk a ni. Mahse a theih loh avangin a tuar tlang ta a ni.
Isua khan a chanvo kha hre vek mahse, condition dang, possibility dang a awm theih tak mialin a huphurh si a, a Pa hnenah khan no khan pel turin a dil ta niberin ka hria. A chhan chu Isua kha mihring a nih avangin thil zawng zawng kha hriat tirin a awm lo a ni ang, khawvel tawp hun pawh Pa lo chuan vana vantirhkohte pawhin an hriat loh thu kha a sawi si a.
Getsemani huana a dil hma khan a tawngtainaah, Abba, engkim I ti thei a, a ti phawt a, a hnu lehah a theih chuan (if possible) a ti tlat a ni, a dil khan. Tichuan, a hnuah, Aw ka Pa, ka in loh va hei hian mi pelh theih lul loh chuan, nangma thu thu ni rawh se, a ti ta nih kha.
Kawng dang a awm tak si loah chuan kan tan thih thlengin a lo tuar ta zawk a ni. Thihna hnehin a lo tho leh ta bawk a. Haleluiah, Lalpa chu fakin awm rawh se!
Comments
Post a Comment