Kristian nun | Nitina awm dan tur | Chatuan nun neihna | Pa hnen thlenna kawng

He Bible chang hi lo en ila, 

JOHANA 14:6

Isuan a chhâng a, “Keimah hi kawng leh thutak leh nunna chu ka ni; keimaha kal lo chu tu mah Pa hnên an thleng ngai lo.

Isua chauh hi Pa hnen thlenna kawng awm chhun a ni a. Eng tiangin nge Isua-ah chuan kan awm ang, eng tiangin nge Isua-ah chuan kan kal tak ang?

A hranpain Isua-ah han kal chu a mak kan ti mai thei a, han awm a, han kal vak dan tur kha mihring taka ngaihtuah chuan hriatthiam a harsa ve thei a ni.

Mihringte hi sual avangin kan thinlung hi a corrupt tlat tawh a, kan ngaihtuahnate reng reng hi sual lam hlir a ni tlat a. Mahnia kan kal a, eng Anga thil tha tih tum pawh ni ila, keimahnia kan kal chhung chuan kan tha thei dawn lo. Kan zia kan thlak thei ngawt lo. Serthlum kung pawh hi eng anga nasa pawhin theihai rah chuah tum mahse, a thei ngai dawn lo, a nihna a nih miau loh avangin. Hetiang deuh tho hian mihringte hian that chhuah han tum viau mah ila, Isua pawm tlak khawp rah kan chhuah dawn chuang lo. Chuvangin that te, fel te hi tum buai loh law law a finthlak awm e.

Tichuan, mahnia kal kan tum chuan chatuan nun kan nei dawn lo a, Pa hnen kan thleng thei dawn lo a ni. Tichuan, kan nitin hun hman dan tur, eng lai pawha kan nun awm dan tur chu mahni chauha awm mai tawh lovin, Isua Krista hi kan innghah chhan, kan hma hruaitu, Isuaa innghah hlawm tawp kan ngai ta a ni. Fel tum hnua Isua pan nilovin, kan sual lai pawhin kei chu ka sual emai that ka tum buai peih lo, Isua-ah ka awm tawp dawn, Isua-ah ka innghat tawp tawh dawn kan tih atang chiah hian, kan mihring mihrinna chu dah thain kan felna leh thianghlimna kawng awm chhun Isua-ah chuan kan intulut a, tichuan mahni a innghat tawh lovin, mahnia awm mai tawh lovin Isua-ah zawk kan lo awm ta a, zawi zawiin, Isua chuan min siam danglam anga, kan thianghlim telh telh anga, Amah kan lo ang telh telh mai dawn a lo ni.

Mahnia tla hrang tawh lovin, Isua ngheng tlat tawhin, Isua hmachhuan tlat tawhin hun kan hmang anga, misual tha thei miah lo kha, kan thatna, kan felna, min tleng fai theitu awm chhun Isua Krista chuan min tithianghlim anga, Pa hnen kan lo thleng tawh mai dawn a lo ni.

Tichuan, nun hi Krista a ni kan ti thei tawh ang. A chhan chu mahni kan ni tawh lova, Isua-ah kan awm tawh zawk a lo ni. Mahni inrinchhan tawh lovin, nausenin a nu leh pa a ring hlawm tawp ang khan Isua-ah kan innghat hlawm tawp anga, a thu ang zelin harsatna, hrehawmna, hlimna leh lawmna karah pawh Isua-ah chuan kan awm reng tawh dawn a ni. Mihrinna chuan kan thei dawn lo, mahse mihringina a tih theih loh chu Lalpa nen chuan a tih theih zel mai dawn a lo ni. Lalpa chu fakin awm rawh se.