I sukna ngaiah su nawn tawh suh

Hun leh tha, rilru leh ngaihtuahna sen dawna hriat tur pawimawh te | Thil ngai leh ngaiah i hun leh tha, i rilru leh ngaihtuahna seng nawn fo tawh suh.

Sawrkar hnaa inziah tlina sawrkar hna tha tak hmuh ka duh a. Tichuan chumi titur chuan lehkhabu ka chhiar a ngai a. Ka exam tur a zirin chhiar tur bik ka hriat theih nan syllabus ka hriat a ngai bawk a ni. Tichuan, syllabus chu ka en chiang ta a, syllabus mil chuan ka zir dan tur chu ka han duang ta a ni. A chang chuan ka study plan tur ka plan lai la la hian ka plan zawh hma hian thil dang ka tih chhunzawm daih thin a, plan deuh reuh, zo si loin ka kalsan leh mai thin a ni. Tin, a chang chuan ka han plan zo ve ta thlap thin bawk a. 

Tichuan, a tuk atang emaw chuan ka plan dan mil chuan nun hmangin ka han zir chho tan ve ta a ni. Nimahsela ni rei lote a chinah ka phurna a lo liama ka plan chu follow tawh lovin ka theihngilh tan a, thil dang nen ka chawhpawlh tan ta vel mai mai thin a ni. 

Hun lo kal zelin keimahah lehkha zir duhna, tih tak zeta zir duhna lo piang lehin tun atang chuan ka zir tak tak tawh dawn tiin mahni insehruhin syllabus chu ka zawng leh ta a, study plan te chu a bul atang bawk chuan ka han siam leh ta a. Tichuan hmana ka tih thin syllabus collect te, study plan siamte chu ka a bul atang bawk chuan ka hun leh rilru sengin ka han bei nawn leh a, a ngai leh ngaiah ka kual ta fo thin a, ka hun leh rilru ka seng nawn fo ta thin a ni. Hei hi a tha lo hle a ni. 

Engvangin nge he thil ka sukna ngaia ka suk leh thin nachhan hi?
Eng vanga ka thil tih thin ngaiah bawk ka hun leh ngaihtuahna ka sen ral leh thin?

- Ka phurna a reh vangte, teireipeihna ka tlakchham vang te, discipline ka neih that loh vang te a ni thei vek.
- A chhan dang lehah chuan ka hun leh rilru sen ralna thilte hi ka vawnghim tha tawk lo, ka zah tawk lo a ni. 

Engtiangin nge he thil ka chinthan tha lo laka ta hi ka chhuah zalen theih ang?

- Nidangah a hranpaa hun leh rilru senga study plan siam ngai tawh lovin, thil dang ka lo tih san ta daih a nih pawhin emaw, ka phurna rehin lehkha zir lam ka lo ngaihsak lo ta a nih pawhin, ka phur leh hunah a hranpaa ka hun leh tha seng tawh lo tur chuan he ti hian ka tih a ngai tawh zawk a ni:

-- Ka hun leh ka rilru ka senna thil reng reng hi ka zah tur a ni, thamral tir mai mai ka tum tawh tur a ni lo, tiin ka rilru ka siam ang.

-- Kha thil, syllabus neih leh study plan ka siamte kha ka dah tha anga tih bo mai mai awlsam lohna hmunah bangah te ka tar ang, emaw ka file-ah te pawh ka dah tha nghal ang, emaw ka remchan dan apiangin a dah thatna hmunah ka dah tha tawh tur a ni. 

-- Ka hun leh tha, rilru leh ngaihtuahna sen ngaichi thil ka tih dawn reng rengin hei hi ka inhrilh thin tur a ni: Engtiangin nge tuna ka thil tih tum hi a final form-in ka dah theih ang? tiin zawhna ka inzawt thin ang. 

Ka hun leh tha ka rilru leh ngaihtuahna ka senna te hi a tham ral loh ka duh chuan a final form a ka siam chhuah a ngai. Ka syllabus leh ka study plan te pawh ka ngaihtuah fel hnuah a final form tur chu lehkha phekah fiah fel fai taka en let leh theih tura ziah chhuah emaw print te a ni thei ang. Tichuan a final form chu hmun him laia tarchhuah emaw dah that a ni mai.