Thil duh neih theih dan | Nih tum nih theih dan | Goal set dawna hriat tur

Ka duh zawng tak nei thei tur hian sawi ngai lova chiang sa chu taihmakna te, beidawng lova beih tauh tauh te leh self-discipline te hi an ni. Hemi piah lamah hian pawimawh em em chu engtiangin nge ka thil duh chu ka neih theih ang? Eng tiangin nge sawt leh fing fel zawkin hma ka lak ang? Hei hi tun aia tha zawk leh fing fel zawkin eng tin nge ka tih theih ang? tiin mahni inzawh fo thin a tha awm e. Ka hnathawh leh ka thil tih reng rengah hian fing leh rem hre taka chet dan tur ngaihtuah chhuak thei tura zawhna inzawh fo hi chin thanah nei i la a tha khawp mai.

Ka sawi tumah lut tawh ang.

Entirnan, boxer tha tak nih ka duh a, engtiangin nge boxer tha tak chu ka nih theih ang?
- Engtiangin nge boxer tha tak ni thei turin fing leh remhre takin hma ka lak ang? tih hi ka inzawt phawt thin tur a ni. Tichuan, boxer tha nitura thil pawimawh leh tih ngai ho ka hriat zawng zawng ka ziak chhuak vek ang a, ka thendarh dawn a ni, a mal te tein.

Boxer tha tak ni tur chuan heng te hi ka tih a ngai: nitin exercise lak, zingkar tlan, push up, shadow boxing, sparring, real match analysis, practice mental toughness, etc.

Tichuan ka phak ang tawka ka ngaihtuah chhuah theihte chu a mal te tein ka thensawm ta a, chung a mal te tea ka then sawm te chu, he ti hian zawhna ka inzawt leh ang. Heng thil hi engtin nge tun aia tha zawk hian ka improve theih ang? tiin.

Zing karah ka tlan thin a, thlan a chhuak thin a, ka infit phah hle a ni. Tichuan, he ka thil tihah hian engtin nge tun aia thain ka tihhmasawn leh zual theih ang? Ka duh aiin zingah ka tho har thin, ka harh hma pangngai renga, mahse ka harh rual hian tho mai lovin darkar chanve te ka mu thin, chuvangin ka harh tawha muthilh ka tum tawh loh chuan ka tho nghal thin ang, hei hian darkar chanve min save sak dawn a ni.

Tichuan, boxer tha ni tura ka tih ngai ho hrang hrangte ka thiah sawm hnuah a mal te te a tih hmasawn dan tur ka ngaihtuah theuh dawn a ni. Tichuan, chung thil hrang hrang ka thensawmte chu a mal te tea ka tihhmasawn inbelhkhawm chuan result tha tak ka beisei aia tha daih zawk pawh min lo pe thei dawn a lo ni. 

Chuvangin vawilehkhata hmasawn vak tum te, vawilehkhata hlawhtlin tumte hian kan beisei angin a thleng mawh khawp mai. Vawilehkhata tih phutte hi a hahthlak a, rilru a ti zalen lo a, rilru fim leh hahdam takin kan tih theih loh phah zawk fo thin a ni. Chuvangin tun atang chuan vawilehkhata tih vak chiam ai chuan, ka thil duh chu tihlawhtling tura thil pawimawh hrang hrang ho kha a mal te tein ka thiat darh anga, tihhmasawn theuh ka tum zawk tur a ni. Chung thil te tak te te hmasawn theuhte inbelhkhawm chuan ka duh ang result chu min lo pe mai dawn a ni. He tia ka tih hian a hahdam a, a sawt bik bawk ngei ang. 

Entirnan, lung lian tak pakhat hi chhut keh tumin tuboh lian tha takin han chhu ta la. I vawikhat chhutnaah chuan chu lung chu engtin vak mah a awm miah lovang, a khem ve hlek hlek chauh ang, mahse i chhu zel a, i thlan tepawh a tla phung a ni. Tichuan i vawi 30 chhutnaah chuan a rawn khi ta phawk a, vawilehkhatah chu lung chu a rawn keh phel ta phawk a ni. A nih chuan i thil chhut, a hmaa vawi 29 i chhut chu an tangkai lo a, a vawi 30 naa i thil chhut khan lung chu a ti keh ta bik tihna em ni? 

- Ni love, khang vawi tam tak i chhut bek bek inhlawm khawm leh tangrual khan a vawi 30 naah khan lung chu a ti keh ta chauh a ni. A tir atanga a tawp thlenga i tha pek zawng zawng, i chhut zawng zawng kha an pawimawh vek a ni. Mi tam tak chuan mi hlawhtling te hi zan khat thil thua hlawhtlinga ngai an awm thei awm e, mahse a ni lo, zan tam tak anhnathawh inbelhbawm avangin a chang phei chuan vawilehkhatah hlawhtlinna an tawng baw ta thut zawk thin a lo ni. 

Chuvangin ka thil tih thin ka habit-te hi a tirah ho lam takin lang mahse a inbelhkhawm zela nakinah chuan ka nun awm dan tur, ka hma hun a lo siam rem thin a lo ni.

Lehkhabu chhiar habit ka neih chuan nakin lawkah chuan mi smart, mi hriatna zau tak ka ni thei.
Ruihtheih thil tih habit a ka neih chuan nakinah chuan mi hrisel lo, mi khawngaihthlak takah ka la chhuak thei.

Chuvangin tuna ka thil tih thin, habita ka neihte hi hun insiama habit tha nge habit tha lo an nih tih ka chhut a ngai a ni, result ka duh ang min pek dawn loh chuan thlah nghal hmiah hi a finthlak ang a, result ka duh ang min pek theih erawh chuan he habit hi eng tin nge tun aia tha zawkin ka siam theih ang? Tun aia tha zawkin engtin nge he habit hi ka kalpui theih ang? tiin tihhmasawn zel ka tum dawn a ni. 

Inspiration: Atomic Habit - James Clear