I mal love. I kiangah Isua Krista a awm

I am not alone. 

He khawvelah hian ka mal tawh lo, englai pawhin Isua nen ka hringnun hi ka hmang tawh a ni. Isua nen englai pawhin ka awm, tih hi hre reng ila ka va duh em!

Thli thaw vuk vuk, ruah sur buan buan, khawpui ri leh kawl phe zuai zuai kara thlamuang taka ka mut thin lai kha chu ka naupan zual lai tak tak kha a ni. Ka hlau ngai lo, ka mut a tui zawk thin. Ka Nu leh ka Pa te kha ka ringin ka thlamuanpui em a ni. Ruah surin kan inchung rangva a rawn nan ri buan buan te, thli thaw vuk vukte khan ka Pa kha a mut hle hle tir loh chang a awm thin ngeiin ka hria a ni. Varandaah te kalin a chhuak sek thin a, a phe ve vat vat thin, a chhungkaw him tlannan a ni ngei ang chu. Mahse kei chuan nuam ka ti zawk tlat thin a ni. Ka thla kha a muang em a ni.

Mahse, tunah chuan hun a lo kal zel a, ka lo puitling ve thawkhat ta viau mai. Ruahsur a nasat deuh te, thli a thawk vuk vuk te leh khawpui ri dur dur leh kawl phe zuai zuai hmuh tawh hi chuan thla hi a muang mawh khawp mai, Hlauhna chhete tal hi chu a cham reng mai hian ka hria. Kawlphe leh khawpui ri avanga phut leh zukna te. A chhan chu keimah maiin he khawvelah hian hun ka lo hmanga a tak taka innghahna leh rinchhan tur ka lo nei ta mang lo, engmah hian ka thla a timuang famkim thei meuh lo. 

Mahse, thil pakhat ka lo hriat loh vang a ni.

Chu thil chu heihi a ni: Ka mal lo, Isua Krista hi ka kiangah a awm reng a ni. Isua hnungah ka kala, Isuain min kaia, Isua hniak hnung hi ka zui tawh zawk a ni. Harsatna lo thleng te, chhiat rupna lo thleng te leh mihring te chiaina karah pawh ka hlau tawh lo ang, a chhan chu Isua'n min chelh a, ka hmaah a ding reng a ni.

Ni e, Isua ka neih chuan lirnghing, chhiatna nasa leh hlauhawm tam tak karah pawh muang te'n ka awm thei ngei ang, Isua nen chuan. Chuvangin tun atang chuan Isua nen zela nun hman ka va chak em. Ka mal lo a ni tih hi hre reng ila, chumi hriatna nen chuan awm reng tawh ila, ka duh a ni.