Min tanpui a ba kher lo ang

He thil hi Lammuala Ninevi challenge an neihnaah Mizoram sual thupha chawina hun kan nei a ni. Hetah hian ka kal ve a. Tichuan, karlakah mi hrang hrangin thu an sawi a ni. Heng zingah hian ka rilru luah deuhtu pakhat chu Frederick-a thusawi pakhat kha a ni a. He ti deuh hian a sawi a ni: Kan tan kan tih hi chuan Lalpa hian min support a ba lem lo, min support kher lovang, mahse Lalpa tana kan tih chuan Lalpa hian a chakzia tihlana, mal min sawmsak a chak ngawt ang.

He thil hi a dik hlein ka hria a ni. Entirnan: Kan school naupang pakhat veng dang daih a mi chu tlaiah a thiante nenah mualah an inkhel a, an inkhlehnaah a inhliam palh hlauh mai a, damdawiinah hruai chhoh a ngai dawn a ni. He thil hi hre ta ila, ka awmna veng atanga an inkhelhna hmun veng dang daih a va kala va buaipui kha ka tih a rinawm loh a ni. A chhan chu inhnam hnawihna ka nei lo a, amah buaipui tur chuan a thiante a inkhelhpui te leh a chhungte kha an awm a ni. Nimahsela, chu naupang chu an inkhelh hma niin tlaiah inkhel ru, in sport a hnai tawh a inkhelh tam i ngai tiin, an inkhelh hun tur leh timing te chu ka hrilh a ni. A nihna takah chuan thil dang daih tih duh a nei a, mahse keimahin inkhel tura ka tih avangin a inkhel ta zawk a, tichuan lo inhliam ta se, damdawiinah hruai chhoh ngaita se. A inhliam thu leh damdawiina hruai chhoh a ngaihthu hi min lo hrilh ta se, hmanhmawh takin amah pui turin ka kal ngei ang, a nih loh vek pawhin damdawiina kan chu ka ba ve ngei ang. A chhan chu kha a thil tihah khan ka inrawlh ve tlat a, chhiat a thata mawhphurhna kawng eng emaw chena lak kha ka tih tur a ni tlat a ni. 

Hetiang deuh hian kan nitin hun hmannaah hian harsatna kan tawh changte hian Lalpa hnenah A tanpuina kan han dil thin a, a nihna takah chuan Lalpa hian min tanpui hi a ba lemin ka hre lo a ni. A chhan chu a tel miau lo a. Kan lehkha zir chhante hi kan chhut chian chuan keimahni tan kan chhungkaw tan vek kan lo zir fur hlawm a. Hlawhtlinna chante hi kan chaka mahse Lalpa hian mal minsawma min hlawhtlin tir hi a ba kherin ka ring lo. Mahse ka lehkha zir chhan chu Lalpa rawng zau zawka ka bawl theih nan te, midang harsa zawkte khai chhuah nan leh Lalpa hnaih tir theih nana hlawhtlin chaka lehkha ka zir erawh chuan Lalpa a tel ve miau avangin, Lalpa pawm tlak a nih ngat chuan Lalpa hian mal min sawm a chak anga, min tanpui a duh ngawih ngawihin ka ring a ni. 

Chuvangin kan thil tum te kan thil tih chhan te hi Lalpa a tel ve em tih hi inzawt hmasa ziah thin ila a tha ngawtin ka ring a ni.