Thil tha tihin awmzia a nei lo. Isua Pa hnen thlenna

Nautein a nu leh pa kiangah ngaih ngam takin a awm thin a, amahin thil han tih tum te leh a nu leh pa lawm zawng tih tum hranpa vel lovin, a nu leh pa bulah a innghat fai vek tawp a ni. 

Ni e, amaha thil han ti thei kha a ni lo, naute mai a ni. Ven ngai, awmpui ngai a ni si a.

Keini mihringte pawh hi Isua tel lo chuan engtihna mah kan ni lo a, rah pawh kan chhuah thei hek lo. Isua hi kan mamawh a ni. Kei grêp hrui chu ka ni, nangni a pêngte chu in ni; tu pawh keimaha awm renga, kei pawh amaha ka awm rengna chu, chu mi chu tam takin a rah ṭhîn; keimah lovin eng mah in ti thei si lo. ‭JOHANA‬ ‭15:5‬

Mahse vawi tam tak Isua thuawih tum hian, thil tha tih tum hian tan hi ka lo la ve fova, ka thil tih that chu ngaih tih that nan hman ka tum fo va, mahse a nihna takah chuan he ka thil tih that ve te hi chu tha a ni phak lovang. Fel thei reng reng tawh lo ka ni a, ka thatna leh ka felna kawng awm chhun chu Isua Krista chauh hi a ni. Chuvangin ka thil tha tih tum dan, ka rilru put hmang hi ka thlak a ngaiin ka hria. 

Vanram kai nan emaw Lalpa tih lawm nana thil tha tih tum lovin, Isua Krista ta ka nih tawh vang leh hmangaih ka thlan tawh zawk avangin Isua Krista ah chuan ka awm hmasa phawt zawk tur a ni. Tichuan Anin titura mintih te chu Amah rinchhan chungin ka tichauh zawk ang.

A hranpaa fel tum viau te thil tha tih tur dap te hi chu a dik ka ring lo. Chuvangin ka felna leh thianghlimna awm chhun ka famkimna kawng awm chhun Isua Krista-ah chuan naute iangin ka nih ang ang hian ka intulut tawp tur a ni. A kaihhruai theih turin ka inpe zawk mai tur a ni. Chutiang ni lova Lalpa tihlawm tuma thil han tihkual vel kha chu ka thinlung kha a dik lo palh ang. Tin that tum avanga thil tih hi a kawng hmang a ni lo. Misual chhanchhuah ngai kan nih avangin Isua Krista kan tan, kan felna, Lalpa hmaa kan thatna ni turin a lo kal a ni tawh zawk a, Lalpa hnena let thei lo, inrem thei tawh lo kha kan inremna turin a lo kal a ni zawk a, chuvangin thil tha tih hmanga Lalpa hnaih lo tum hi a kawng hmang a ni lo. Thil tha tih hmangin ka hnaih theih tawh loh vang reng hian Isua a lo kal si a. Lalpa ka hnaih theih nana kawng awmchhun leh kawng minpetu Isua Kristaa lo awm mai hi ka tih tur a ni. Isuan a chhâng a, “Keimah hi kawng leh thutak leh nunna chu ka ni; keimaha kal lo chu tu mah Pa hnên an thleng ngai lo. JOHANA‬ ‭14:6‬

Tichuan, Isua-ah awm phawt ila, Isua ka rin avang leh hmangaih ka thlan tawh avangin titura min duhte Amah rinchhan chungin ka ti tawh zawk ang.

He ka thil tih chhan hi ka thiam chan nan te, Lalpa ka hnaih theih nan te, Lalpa hmaa ka score that tum vanga ti ka ni lova, Lalpaa ka awm tawh zawk avangin Amah ka hmangaihna leh rinna avang zawkin ka ti a ni.

A mawlmang thei ang bera sawi chuan, ka thil tih that te hian awmzia a nei lo. Isua ka Lal leh Chhandamtua ka pawmna hian awmzia a nei zawk, chu chu ka tan Pa hnen ka thlenna kawng awm chhun a ni. Tichuan Isua chu ka Lal leh Chhandamtua ka neih chinah chuan ka nihna thar angin ka awm tawh zawk anga, sual bawiha ka awm laia ka tih thinte ti tawh lovin Lalpa duh zawng ka ti tawh zawk ang. Heta ka thil tha/Lalpa duh zawng ka tih chhan chu ka tih avanga Vanram kai tum nilovin, Lalpa ka rinna leh hmangaih avang zawkin ka ti zawk a ni. Lalpaa ka nihna thar chuan ka nung tawh zawk a ni.

Lalpa tih lawm nan leh Vanram kai tum avanga thil tha tih hian awmzia a nei lo. Isua Krista ka hmangaihna leh rinna avang zawka A duh zawng ka tihna erawhin awmzia a nei thung, vanah ro kan khawlkhawm. Miin keimah avânga an hau che ua, an tihduhdah che ua, dâwta sual tinrênga an hêk hunah che u, in eng a la thâwl ang. Lâwm ulangin, nasa takin hlim rawh u; vânah in lâwmman a awm hnem si a; chutiang bawkin in hmaa zâwlnei awmte pawh an tihduhdah ṭhin kha. Matthaia‬ ‭5:11‭-‬12‬ ‬

Do not store up for yourselves treasures on earth, where moth and rust consume and where thieves break in and steal; but store up for yourselves treasures in heaven, where neither moth nor rust consumes and where thieves do not break in and steal. For where your treasure is, there your heart will be also" (Mt. 6:19-21 NRSV)

Ka thil tihthatte hi ka lo chhuang anga, midang hmuh tlin loh nan te hian ka lo hmang leh ang tih hi ka hlau a ni. Hetiang rilru pua ka lo awm leh chuan hei hi hrechhuak thei ila ka ti khawp mai, ka thil tih hmangin that ka lo tum leh ta, ka felna leh Pa hnen ka thlenna kawng awmchhun Isuaah ka innghat lo leh ta tih hi.

Ka Bible chhiar chhan te, ka tawngtai chhan te, A fak hla ka sak chhan te, ka inkhawm chhante hi Isuaa ka awm tawh vang zawk ni tawh se. Inkhawm vanga ngaihtha loin, inkhawm vanga Vanram kai tumna rilru ni lovin, Isua ta ka nih vang zawka ti nichauh zawk ila, ka duh a ni.

Mihring hi chu thil tha kan tih hian kei ni aia titha lo zawk te chungah hian chapo te, uante a awl a, an aia thil titam zawk titha zawk nia kan inhriat hian anmahni hmuh nepna leh thinrimnate hi neih a awl thin hle hian ka hria. Chuvangin hei hi hre reng ila ka duh a ni: Lalpa duh zawng anga ka lo awm a nih chuan chapo chu sawi loh Lalpa hmaa thuhnuairawlh tak chungin lawmthu sawi zawk tur ka ni. Ka lo chapo vaih chuan Isuaah ka awm lo leh ta em ni, thil tih that hmangin Pa hnen thlen ka tum leh ta em ni, tih hi hrechhuak tawh thin ila ka duh a ni. 

 ‘Inthawina aiin khawngaihna ka duh e,’ tih hi engtihna nge lo hre tawh ula chuan, mi pawisawi lote chu thiam loh in chantîr lo tûr, MATHAIA‬ ‭12:7‬‬

Lalpa, ka felna chu Isua Krista chauh hi a ni tih mi hriattir fo la. Ka thil tih that te hi ka lo chhuang zawk dawn a nih chuan ka felna leh thianghlimna awm chhun Isua Kristaah chuan min hruaikir leh thin ang che. Lalpa, Isua Kristaa awm reng thiam turin min pui ang che. Englai pawhin ka felna Krista ah chuan ka awm reng theih nan min tanpui la, thil tih avanga I hnen thlen tum tawh lovin ka hmangaihna vang che, ka rin zawkna che avanga I duh zawng ti chauh zawk thei turin min zirtir ang che. Isua Krista kianga awm reng ka duh e, nautein a nu leh pa kianga a zawng zawng nghat tawpa a awm ang hian ka Lalpa leh min chhandamtu Isua Krista kiangah chuan min awm tir reng rawh aw. He thuziak chhiartu te pawh hi nangman I Thlarauthianghlimin thuam chak la, Isua Kristaa awm reng nachang hre tawh turin min tanpui theuh ang che. Lawmthu sawi chungin ka dil a che, Isua Krista hmingin, Amen.